آیت اللہ العظمیٰ شبیری زنجانی 99 سال کی عمر میں رحلت فرما گئے

آیت اللہ العظمیٰ سید موسیٰ شبیری زنجانی، مراجع عظام تقلید میں سے ایک، نے 99 سال کی عمر میں دعوتِ حق کو لبیک کہا۔ صدا و سیما خبر رساں ایجنسی اور قم میں موجود مرجع تقلید کے دفتر نے اس خبر کی تصدیق کی۔

🔹 مرجع تقلید کے دفتر نے ایک اطلاعیہ جاری کیا جس میں قرآن کی آیت کا حوالہ دیتے ہوئے کہا گیا کہ اہل بیت عصمت و طہارت (علیہم السلام) کے فقیہ اور جہان تشیع کے بلند پایہ مرجع، آیت اللہ العظمیٰ شبیری زنجانی نے اللہ سے ملاقات کی۔ اطلاعیہ میں ان کی بابرکت عمر اور پرافتخار زندگی کو گہری بصیرت، مسلسل علمی مجاہدت، اصیل فقاہت کے تحفظ و عظمت، معارف اسلام کی نشر و اشاعت، تشیع کے تحفظ اور عوام کے لیے خیرخواہی و ہمدردی سے بھرا ہوا قرار دیا گیا۔

🔹 اطلاعیہ میں مولا و آقا صاحب الامر حضرت بقیۃ اللہ الاعظم (عجل اللہ تعالیٰ فرجہ الشریف) کی مقدس بارگاہ، حوزہ ہائے علمیہ، ایران کے شریف عوام اور دنیا بھر میں مرجعیت کے چاہنے والوں کو اس جانگداز صدمے کی تسلیت پیش کرتے ہوئے کہا گیا کہ ان کے پاک پیکر کی تشییع و تدفین کی تقریب کا اعلان بعد میں کیا جائے گا۔

🔹 آیت اللہ سیستانی کا آیت اللہ شبیری زنجانی کی رحلت پر تعزیتی پیغام:

مختلف علماء اور شخصیات نے آیت اللہ سید موسیٰ شبیری زنجانی کی رحلت پر تعزیتی پیغامات ارسال کیے۔ آیت اللہ سید علی سیستانی نے ایک پیغام میں آیت اللہ شبیری زنجانی کی رحلت کو ایک دردناک مصیبت اور عظیم صدمہ قرار دیا اور یہ مصیبت حضرت ولیعصر (عج)، حوزہ ہائے علمیہ، مرحوم کے خاندان اور عام مومنین کو تسلیت پیش کی۔ انہوں نے آیت اللہ شبیری زنجانی کو دین کے بزرگ علماء، حوزہ علمیہ قم کے ستونوں اور عالم ربانی کی نمایاں مثالوں میں سے قرار دیا اور زور دیا کہ ان کے قیمتی علمی آثار، دینی خدمات اور عملی سیرت اہل علم کے لیے ایک گراں بہا میراث اور دائمی نمونہ عمل رہے گی۔

🔹 سید عباس عراقچی، اسلامی جمہوریہ ایران کے وزیر خارجہ نے آیت اللہ العظمیٰ سید موسیٰ شبیری زنجانی کی رحلت پر ایک تعزیتی پیغام جاری کیا۔ انہوں نے نبی اکرم صلی اللہ علیہ وآلہ وسلم کا یہ فرمان نقل کیا کہ جب عالم کی موت ہوتی ہے تو ایسا شگاف پڑتا ہے جسے قیامت تک کوئی چیز پر نہیں کر سکتی۔ انہوں نے قرآن کی آیت "انا للہ و انا الیہ راجعون" کا حوالہ دیتے ہوئے کہا کہ عالم ربانی، فقیہ فرزانه اور جہان تشیع کے بلند پایہ مرجع کی رحلت حوزہ ہائے علمیہ، علمی و دینی معاشرے اور مکتب اہل بیت عصمت و طہارت (ع) کے تمام چاہنے والوں کے لیے ایک بڑا صدمہ اور بڑی مصیبت ہے۔

🔹 اسلامی مشاورتی اسمبلی کے اسپیکر محمد باقر قالیباف نے آیت اللہ العظمیٰ سید موسیٰ شبیری زنجانی کی رحلت پر تعزیتی پیغام جاری کرتے ہوئے انہیں عالم ربانی، گہرے مفکر فقیہ اور جہان تشیع کا بلند پایہ مرجع قرار دیا۔ انہوں نے کہا کہ ان کی رحلت حوزہ ہائے علمیہ اور مکتب اہل بیت (ع) کے چاہنے والوں کے لیے ایک بھاری اور ناقابل تلافی صدمہ ہے۔ قالیباف نے انہیں ہمارے زمانے کی نمایاں ترین علمی و روحانی شخصیات میں سے قرار دیا جنہوں نے اپنی عمر فقاہت، تدریس اور اہل بیت (ع) کے معارف کی پاسداری میں گزاری۔

🔹 دوسری جانب، حجت الاسلام والمسلمین محسنی اژہ ای نے بھی آیت اللہ شبیری زنجانی کی رحلت پر تعزیتی پیغام جاری کیا۔ انہوں نے کہا کہ عظیم المرتبت فقیہ اور مراجع عظام میں سے ایک نے ملکوتِ اعلیٰ سے ملاقات کی اور یہ ایک عظیم فقدان ہے۔ انہوں نے کہا کہ فقہ آل محمد (ع) کی تعلیم و تعلم میں ان کی مجاہدت زبان زد عام تھی اور وہ تشیع کے اصیل ورثے کے امانت دار نگہبانوں اور مکتب نورانی فقہ جعفری کی نمایاں شخصیات میں سے تھے۔ محسنی اژہ ای نے بھی یہ صدمہ حضرت بقیۃ اللہ الاعظم (عج)، علماء، مراجع تقلید اور تمام شیعیان و مقلدوں کی خدمت میں پیش کیا اور اللہ سے ان کے لیے رحمت و مغفرت کی دعا کی۔

🔹 قم میں آیت اللہ شبیری زنجانی کی رحلت پر تین روزہ عام سوگ کا اعلان:

قم کے گورنر نے آیت اللہ العظمیٰ سید موسیٰ شبیری زنجانی کی رحلت پر صوبہ قم میں تین روزہ عام سوگ کا اعلان کیا۔ انہوں نے کہا کہ اس بزرگوار عالم کی رحلت کی مناسبت سے صوبہ بھر میں تین روزہ سوگ کا اعلان کیا جاتا ہے۔

🔹 قم کے گورنر کا اعلان: تشییع کے موقع پر عام تعطیل:

قم کے گورنر "انجینئر بہنام جو" نے یہ بھی اعلان کیا کہ بروز بدھ (چہارشنبہ یکم مہر 1405) کو، آیت اللہ العظمیٰ شبیری زنجانی کے پیکر کی تشییع کی تقریب کے انعقاد کے ساتھ ساتھ، صوبہ قم میں عام تعطیل ہوگی۔ انہوں نے قم کے شریف عوام، مراجع عظام تقلید، حوزہ ہائے علمیہ، علماء و روحانیون اور آیت اللہ العظمیٰ شبیری زنجانی کے گھرانے کو تسلیت پیش کرتے ہوئے، اس بلند پایہ مرجع کے لیے اللہ کی وسیع رحمت اور بلند درجات کی دعا کی۔

🔹 عمار حکیم نے آیت اللہ شبیری زنجانی کی رحلت پر تعزیت کا اظہار کیا:

سید عمار حکیم، عراق کی قومی حکمت تحریک کے سربراہ نے اپنے ایکس اکاؤنٹ پر لکھا کہ نہایت افسوس اور غم کے ساتھ، ہمیں مقدس شہر قم کے حوزہ علمیہ کے بزرگوں میں سے ایک، دینی مرجع اور نمایاں عالم، آیت اللہ العظمیٰ سید موسیٰ شبیری زنجانی کی ایک طویل بیماری کے بعد رحلت کی خبر موصول ہوئی۔ انہوں نے کہا کہ مرحوم ایک بزرگ فقیہ، محقق اور ممتاز استاد تھے جنہوں نے اپنے علمی ورثے اور بے شمار خدمات کے ذریعے حوزہ علمیہ کو مالا مال کیا۔ انہوں نے بتایا کہ انہوں نے دو عظیم اساتذہ، سید محسن حکیم اور سید خوئی کی خدمت میں تعلیم حاصل کی اور ان کی فقہی آراء پر خصوصی توجہ دی۔

تشییع آیت اللہ شبیری زنجانی: مسجد امام حسن عسکری سے حرم حضرت معصومہ تک

🔹آیت اللہ العظمیٰ سید موسیٰ شبیری زنجانی کا پیکر بدھ 23 ستمبر 2026 (یکم مہر 1405) کو صبح 9 بجے مسجد امام حسن عسکری (ع) سے حرم مطہر کی طرف تشییع کے لیے لایا جائے گا جبکہ حرم مطہر کریمہ اہلبیت حضرت معصومہ (سلام اللہ علیھا) میں ہی سپرد خاک کیا جائیگا۔

🔹 آج (پیر) 30 شہریور کو شام 4 بجے انکے دفتر میں وداع کی تقریب منعقد ہوگی۔ عام مومنین، طلبہ اور فضلاء سے تشییع میں بھرپور شرکت کی دعوت دی گئی ہے۔ آیت اللہ العظمیٰ سبحانی سمیت متعدد علماء و عہدیداران نے ان کے بیت میں حاضر ہو کر تعزیت کہی ہے۔

اس خبر کو اپڈیٹ کیا جا رہا ہے۔