قانون کی حکمرانی کو خطرہ: امریکا نے آئی سی سی ICC کی صدر اور نتن یاہو کے خلاف وارنٹ دینے والے وکیل پر پابندیاں عائد کر دیں

امریکہ نے انٹرنیشنل کرمنل کورٹ ICC کی جاپانی جج صدر "ٹوموکو اکانی" اور اس سینئر وکیل (سینیگالی شہری) "عبداللہ سیے" پر پابندیاں عائد کر دی ہیں جنہوں نے جنگی مجرم صہیونی وزیراعظم نتن یاہو کے خلاف گرفتاری کے وارنٹ کی درخواست کی تھی، جسے آئی سی سی نے "قانون کی حکمرانی کے لیے خطرہ" قرار دیا ہے۔

🔹 امریکا نے انٹرنیشنل کرمنل کورٹ (آئی سی سی ICC ) کے خلاف اپنی مجرمانہ مہم میں ایک نیا اور سخت قدم اٹھاتے ہوئے عدالت کی صدر ٹوموکو اکانی اور سینئر ٹرائل وکیل عبداللہ سیے پر پابندیاں عائد کر دی ہیں۔ یہ پابندیاں ٹرمپ انتظامیہ کے اس عزم کا حصہ ہیں جسے وزیر خارجہ مارکو روبیو نے "آئی سی سی کی اینٹ سے اینٹ بجانے" کی مہم قرار دیا ہے۔

🔹 روبیو نے کہا کہ ان پابندیوں کا مقصد وہ افراد ہیں جنہوں نے "آئی سی سی کی جانب سے ان حکام کی تحقیقات، گرفتاری، حراست یا استغاثہ کی کوششوں میں براہ راست مصروفیت" اختیار کی ہے جن کی حکومتوں نے عدالت کے دائرہ اختیار سے اتفاق نہیں کیا۔ خاص طور پر، عبداللہ سیے وہ سینئر وکیل ہیں جنہوں نے نسل کشی میں ملوث اسرائیلی وزیراعظم بنجمن نیتن یاہو کے خلاف گرفتاری کے وارنٹ کی درخواست کی تھی اور وہ خود آئی سی سی کے جج کے انتخاب کے لیے نامزد ہیں۔

آئی سی سی ICC کی شدید مذمت

🔹 آئی سی سی نے ان پابندیوں کی شدید مذمت کرتے ہوئے کہا کہ یہ "قانون کی حکمرانی کو خطرہ" ہیں اور "جب قانون نافذ کرنے والوں کو دھمکی دی جاتی ہے تو بین الاقوامی قانونی نظام خود خطرے میں پڑ جاتا ہے۔" صدر اکانی نے دسمبر میں ہی خبردار کیا تھا کہ امریکی پابندیاں "عدالت کے کام کو تیزی سے کمزور کر دیں گی اور اس کے وجود کو ہی خطرے میں ڈال دیں گی۔"

🔹 یہ پابندیاں اس وقت عائد کی گئی ہیں جب آئی سی سی پہلے ہی شدید دباؤ میں ہے۔ جولائی میں عدالت کے دو تہائی ارکان پر جھوٹے جنسی بدکاری کے الزامات کے بعد چیف پراسیکیوٹر کریم خان کو ہٹا دیا تھا، جسے خان نے مسترد کر دیا تھا۔ اسرائیلی میڈیا نے رپورٹ کیا ہے کہ اسرائیلی وزیر خارجہ گڈون سار نے خان کو ہٹانے کے لیے ایک ٹاسک فورس کی قیادت کی تھی۔ پچھلے سال ہی امریکہ نے کئی آئی سی سی پراسیکیوٹرز اور ججوں پر پابندیاں عائد کی تھیں، جس کی وجہ نیتن یاہو اور سابق وزیر دفاع یوآو گیلنٹ کے خلاف وارنٹ اور افغانستان میں امریکی فوجیوں کے خلاف تحقیقات کو قرار دیا گیا تھا۔